Kawas te 2025 te 10 byacing ru 10 Ryax, minxan saku maki squ puyu na sotoxu, mnwah saku ptke sinbung na Tayal.

zik nqu ryax nasa ga mintazil saku ryokang. ini maku baqi sa hazi na iyat maku sakaw nanak, ru ini pskmi’ roziq, ini ga nyux saku s’unan na mngungu ka spkayal maku suxan, si saku lhaw qutux lhngan, kinsuxan nya mtama saku te puyu na sotoxu ptke sinbung ga ana si bu’ gwagi qu turu maku ga swa saku ini nangi myabux ga. sesazing ryax ka pnama sami ptke ga, memaw si tus tus qu yabux maku, swa maku wal zngyan kwara la, ana ktu uzi ga, wal nya zngyan uzi qu k’yayan la.

ulung su maki qu sengpay ka lhani ptzyuwaw zyuwaw qani, mwah rmaw knan ru spgleng saku nya. qlung balay tmasuq qu pincyuwagan maku qani, skura saku mita squ zyuwaw qani ga, iyat balay kinkeri wah!

mzimu saku balay, baha hmswa ga, skahul maku ke ta ’Tayal, spinqzyu maku squ kwara cinbwanan, wayal nha pongan qu kinbetunux na hmali kinbkesan ta!

qalang maku：

sm’inu ga yan nqu tuqi rgyax ka thgiru musa te twahiq, blaq balay ktan qu inrkyasan nya.

cyux maki sa Sincikeng Nahuy go, turu balay rgyax na Uraw qu ngasal maku. szyon maku balay qu qalang maku Mrqwang, ru nyux sqani kwara qu gluw maku, sgalu saku na qbsuyan maku ru bbnkis na qalang maku. ana saku nyux maki te hugal ga, ungat balay spngan qu kinqoyat maku, gi kwara qu ’Tayal qalang maku ga, lha qu nyux maku galan mpuqoh. kmal qu ke mha, “ita ka qnxan ta ga, kruma ga magal ta, kruma ga pqbaqan ta. qnxan ta squ rgyax ga, ini p’ubu lga yasa qu son mha kinbleqan la. qutux qutux ryax ka mbzinah saku qalang maku ga, ps’unan saku miq rngu na qalang mwah sa te hugal. mqoyat saku balay m’laqi na Tayal Mrqwang ru sktsaw maku balay uzi.